إحساس غريب

معرفش عنك .. غير أنى منك
بداية حياتى .. ويا المطر
و فات عليا كام مطر
أحلام بتسقط زى المطر
مع دمعتى
و خطوتى زى الطيف
مالهاش أثر
إحساس غريب
بيشدنى .. جوة قلبك
خلانى أحبك
إحساس غريب .. خلاه إنكسر
معرفش عنك .. غير أنى منك
إحساس غريب
بيشدنى .... بيهدنى
فى بُعدى عنك
إحساس بالخطر

حلم

فى الحلم كنت بأرسمك
أحدد ملامحك
فوق حيطان القلب مرة
وكل مرة
يخاف الفجر يكملك
فوق ضلوعى العاشقة مرة
من فرحتها ... ما تتحملك
بين عيدان الزرع الاخضر
كنت أشوفك .... كنت أصغر
من إنى لحظة أتخيلك
وكان القلم يدوق الآلم
فوق الورق
جوة الحلم ... بين الخيال
تِعب الخيال
من أنه مرة يحددك
وياكدك
يا حلم إترسم جوة القلب
عَجز القلم .. إنه يقلدك