BLOGGER TEMPLATES AND TWITTER BACKGROUNDS »

الاثنين، 20 ديسمبر، 2010

رجعتينى الحياه



رجعتينى الحياه
من بعد غـُربة طالت سنين
وحلم عشش جوة البرارى
ولا هو دارى طريقه منين
كان حلمه يخرج يدور عليكِ
وبين إيديكِ يقول كلمتين
بحبك وخايف
كان أمله بس فى دمعتين
دمعة تقولك بحبك
ضُمينى طفىء الإنين
ودمعة تغسل رموشه
المتلطخة بالطين
رجعتينى الحياه
عودتينى إن الحياه
من غيرك مش حياه
الحب والضحكة البريئة
واليأس اللى تاه
مش حياه
الربيع والنسمة الرقيقة
اللى معاه مش حياه
الصدق والاخلاص
وشوق العاشق
لــ منتهاه مش حياه
عودتينى إن الحياه
بس إنـتِ
الصبح إنتِ
لحظة ما تشرق الشمس
من بين عيونك
أجرى أستخبى فى ضلهم
آه من سحرهم
دايب أنا فى وجودك معايا
ومهما أقولك بحبك
مش كفاية
عدد كل حاجة مالهاش عدد
عدد كل حلم مات
وكل حلم بيتولد
مش كفاية
بحبك
وقـُربك بس باتمناه
رجعتينى الحياه

7 التعليقات:

gogo!sf يقول...

صباح التفائل يا قمر

الحمد لله انها رجعتك الحياه ده انا كنت فقد الامل وقربت ايأس من كتر يأسك اللى ملى المدونه عليا

كلماتك جميله اوى يا احمد وكلها تفائل بجد مع انى فى تلك الحظه كلى يأس ومليانه كلاكيع مش عارفه ليه
وحاسه انى لما بكتب كومنت عند حد بيبقى دمى تقيل جدا جدا


بس سيبك انت البوست ده اكتر من رائع والله وسعيده بيه وبيك جدا جدا

بجد مبسوطه انك رجعت زى الاول
عايزة كل يوم بوست جديد انت فاهم ولا ايه انا بحذرك وبس

يومك جميل يا ابو حميد

gogo!sf يقول...

تفتكر ده اول كومنت بعد العوده

حمد الله على السلامه يا ريس

طوبه فضه وطوبه دهب يقول...

بجد بجد رائعه تسلم ايديك يارب ديما من حلو لاحسن

داليـ ـ ـ ـ ـ ـ ــــا يقول...

يعنى نقول مبروك رجوعك للحياه
وكمان رجوعك للتدوين
حمدلله على السلامه ياشاعر

احساس طفلة محبة للرومانسية بس واقعية يقول...

فعلا لما حد بيحب حد بيتعلق بية تمام و بتختلف معانى الاشياء بتتولد مشاعر جديدة والدنيا كلها بتبقى بتدور بية وحوالية

بوست رائع كعادتك
مش جديد عليك

ياااه بقالى كتير مجتش هنا
اخبارك اية ؟
كنت حاسة ان الناس كلها غايبة واترينى انا اللى مكنتش هنا وكل واحد فى موقعة الحمد لله
عشان ارجع تانى واستمتع بأفكار كل واحد وكلماته

دمت بكل خير
تقبل مرورى

اسماء واحلام فى وجدانى يقول...

جوجو
مالك بقى ومال الكلاكيع دى كلها
ان شاء الله تكونى بخير دايما ويبعد عنك اى تعب او زهق ياااااااااااااارب
وبعدين اول تعليق فين حسابه

دهب متشكر جدا ليكى

داليا
هى مبروك واحدة والتانية بحساب
عشان نعرف نرجع زى الاول
وعقبال ما ترجعى انتى كمان
يااااااااااااااااااااارب

طفلة رومانسية
من علامات الزمن اللى فات
منورة طبعا
والله فكرتينى بالبداية واد ايه كانت جميلة اوى والناس اللى بدوا معانا كلهم اختفوا تقريبا او اتفرقوا او تاهوا مش عارف مش باقى دلوقتى غير دهب وفكرة وجوجو من المجموعة القديمة لكن فى ناس جديدة جميلةاوى برضه
بس تفتكرى الايام دى هترجع تانى
مش انتى بس اللى غبتى
ده 90% من الناس غابت

Räumung wien يقول...


مدونة مميزة
كل تقديرى واحترامى لكم ... :)