على راى المثل

بسم الله الرحمن الرحيم
اخواتى الاعزاء طبعا مش معقول بعد الغيبة دى كلها ارجعلكم بموضوع حزين ،، انا قلت يا واد يا احمد خف على اخواتك شوية وكفاية وجع قلب وموضوع على راى المثل ده انا نشرته قبل كده بس مش هنا لان هنا مملكتى الحزينة والكوميديا محرمة فيها بس النهاردة فى كذا مناسبة جميلة اولهم طبعا جارة القمر والتانى مشترك برجوع وردة وايناس وطبعا مفيش حد يقدر ينكر سبب التجمع ده الانسانة الجميلة ميمي اللى جعلت من مدونتها مكتب علاقات عامة لخدمة اخواتها زى ما قالت اخت لينا

*************************

على راى المثل

تمت سرقة هذه الصورة من عند ميمى بواسطة مدونة صديقة

البنت: بحبه يا ماما ده هو اللى خطف قلبى
الام: معقول يا بنتى تصومى تصومى وتفطرى على بصلة
البنت: اعمل ايه يا ماما القلب وما يريد
الام: بس يا بنتى ده لا بيهش ولا بينش
البنت : معلشى يا ماما ده كل شىء بالسيف الا المحبة بالكيف
الام: يا بنتى الحب مش كل حاجة فى ناس من برة رخام ومن جوة سخام
البنت : كده بردوة يا ماما مالقيوا فى الورد عيب قالوا له يا احمر الخدين
وبعدين مش انتى اللى قلتى اللى بيته من ازاز ميحدفش الناس بالطوب
الام: قصدك ايه يا بنت ابوكى , ما انتى زيه بتاكلى وتنكرى , لا بيعجبه العجب ولا الصيام فى رجب
البنت : اسفة يا ماما
الام : لا ابدا يا بنتى ان طلع العيب من اهل العيب !!!!!!!!!!!!!!!!!!!!!!
البنت : وحياتك بقا يا ماما انجزى احسن زمانه جاىء
الام : خلاص يا بنتى الله يهنىء سعيد بسعيدة,
بكرة نقعد جنب الحيطة ونسمع الزيطة
تررررررن تررررررررررررن
البنت : اهو جه .........افتحى يا ماما عقبال ما اتذوق
العريس : هاى طنط
الام : ادخل يا ضنايا
ادخل يا توتو , يا نهار ابيض بنتى بتحب واحد فانكى
تعالى يا حبيبى اتفضل هنا فى الصالون
العريس : مرسى يا طنط
الام : الناس خيبتها السبت والحد وخيبة بنتى ما وردت على حد
العريس : بتقولى حاجة يا طنط
الام : لاء يا عنيا , اومال فين ماما وبابا
العريس : يا طنط اللى ميشوفش من الغربال.......يكشف نظر
الام : مش فاهمة يا ابنى
العريس : الباب اللى يجيلك منه الريح ...........شيله وركب قبنورى
الام : فين امك وابوك يا ولا
العريس: مسافرين
الام : تيتى تيتى زى ما روحتى يا بنتى زى ما جيتى
طيب انت جاى تعمل ايه
العريس: اعمل زى الناس
الام: طيب بتشتغل ايه
العريس : يا طنط اللى اكله من فاسه رايه مش من راسه
الام : يعنى عاطل , يا خرابى كيد وقهر وشى يقسم الضهر
العريس:الله يجازى الاسباب اللى خلتنى اخبط على الباب
الام : وكمان بتبرطم انت متعرفش انا ممك..........
البنت : احم احم
الام : تعالى يا بنتى اللى خدتوه القرعة تخدوا ام الخلول يوه
قصدى ام الشعور , يخرب بيتك يا توتو عوجتلى لسانى
العريس : كده احلى يا طنط خليكى فريش وبلاش كرمشة الوش
قلتى ايه يا ست الكل
الام : قلت الديسك اللى يتعبك فرمته
ومدام ابن الهاكر مكر مفيش فايدة لو عيب عيب فيه اتذكر
وعقربة على الحيط ولا وجود بنتى جوة البيت
مبروك يا ابنى مبروك يا بنتى واسمعى منى
دعوة الام فى الكم ودعوة الحما فى السما
ابنك على ما تربيه وتوتو على ما تعوديه
حماتك على ابنها حنونة وعليكى مجنونة
اضحكى عليها بضحكة وسندوتش وزيتونة
زيتونة بزيتونة تعيشى مع جوزك حرة ومصونة
بلاش تكونى فى الشارع عروسة وفى البيت !!!!!!!!
العريس : ونسيتى اهم حاجة يا طنط
الام : قول يا توتو
العريس: القرش الابيض........بيعوم فى البحر الاحمر
الام: شاطر يا ضنايا
ربنا يوفقكم