نفس الايام

كل خطوة عايزة تسبق الخطوة اللى قبلها
عايزة تنقذ روح بريئة
عايزة تلحق اجمل حقيقة
قبل ما ترحل عن ارضها

كان فكرى اقدر اسابق الزمن
اخدك فى حضنى واضمك
واقولك بحبك ، بحبك
انا زهرة وانت غصنها

نبض القلب كره الثبات
كره كل حلم عاش جواه ومات
اخر نبضة كانت فى قلبى
ماتت معاك من حزنها


دمع عينى نار بتحرق
نار بتأكل كل حاجة
نار ماشية جنب الموجة
وانا فوق الموجة
مركب بتغرق من همها

نفس الشط
بس فرقت معاه الايام
النهاردة من غير كلام
نفس الايام دى كرهتها


خلتنى احبك واطير فى السما
عصفورة طايرة تحت جناحك
انكسر الجناح
رجعت العصفورة لعشها

رجعت مهزومة مصدومة
مش واعية لاى حاجة
بس فى بالها حاجة
من جناحك تعمل كفن على ادها